Украинскиот претседател Володимир Зеленски нареди целосна истрага за смртта на пилотот на авион F-16, Максим Устименко, кој загина додека ја бранеше украинската територија од масовен руски воздушен напад. Според државната новинска агенција УНН, Устименко успеал да уништи седум воздушни цели пред да биде убиен.
„Повеќе од 12 часа траеше воздушната тревога. На нашето небо имаше 477 беспилотни летала, од кои повеќето беа руски ‘Шахеди’, и 60 ракети од различни типови. Русија целеше кон сè што значи живот. Погодена е и станбена зграда во Смила, каде е повредено дете“, напиша Зеленски.
Тој оддаде почит на Устименко и изрази сочувство до неговото семејство и соборци, истакнувајќи дека украинското воздухопловство херојски го брани небото.
Украина под жесток оган: Потребна е модерна ПВО
Во изминатата недела, Русија испукала 114 ракети, повеќе од 1270 дронови и речиси 1100 планирани бомби (КАБ), предупреди Зеленски, додавајќи дека Путин нема намера да го прекине војувањето.
„Потребно е да се запре ова, да се изврши притисок врз агресорот. Ни треба заштита од балистички ракети, дронови и теророт што секојдневно го трпиме. Украина е подготвена да купи американски системи за противвоздушна одбрана – тие го спасуваат животот. Сметаме на лидерството, политичката волја и поддршката од САД, Европа и нашите партнери“, изјави Зеленски.
Претходно, поранешниот американски претседател Доналд Трамп ја отвори можноста за испраќање на системи „Патриот“ во Украина, како дел од напорите за јакнење на украинската воздушна одбрана.
