На патеката Ред Бул Ринг во Шпилберг се возеше единаесеттата трка од Светското првенство во Формула 1 – Големата награда на Австрија, која донесе големо изненадување и доминација на возачите на Мекларен.
Британскиот возач Ландо Норис, член на Мекларен, ја забележа својата третa победа сезонава, надминувајќи го својот тимски колега Оскар Пјастри. Со ова значително ја намали предноста на Пјастри во генералниот пласман, од 22 на само 15 поени разлика. На пиедесталот се приклучи и Шарл Леклер од Ферари.
Трката беше многу драматична, особено поради раното елиминирање на четирикратниот светски шампион Макс Ферстапен од Ред Бул, кој на домашна патека заврши веќе во првиот круг откако удри во болидот на младата италијанска надеж Кими Антонели од Мерцедес.
Уште пред стартот на трката се случи големо изненадување кога Карлос Саинц Јуниор (Вилијамс) остана заглавен во прва брзина за време на формативниот круг, а потоа неговиот болид се запали по враќањето во бокс, па не можеше да настапи на трката.
Возачите на Мекларен, Норис и Пјастри, доминираа со неколку блиски пресметки, но Норис успеа да ги одбие сите напади и да стигне до седмата победа во кариерата. Луис Хамилтон заврши на четвртото место, додека Џорџ Расел (Мерцедес) беше петти.
Во генералниот пласман, Оскар Пјастри води со 216 поени, Норис е втор со 201, а Ферстапен падна на третото место со 155 поени. Следната трка, Големата награда на Велика Британија, ќе се вози за една недела на патеката во Силверстоун.
