Украина објави снимка од командант на омилената Путинова бригада

Украинската воена разузнавачка служба (ГУР) објави аудио-снимка за која тврди дека го прикажува командантот на десантната чета од озлогласената 155. морнаричка бригада на руската армија, како наредува егзекуција на украински заробеник со варварски зборови: „Одрежи му ја главата, набоди ја на кол и фрли го тоа ѓубре“.

Според ГУР, снимката е пресретната на 10 јули и се однесува на украински воен заробеник. Иако независниот медиум Kyiv Independent не ја потврдил автентичноста на снимката, украинските власти уверуваат дека станува збор за автентична комуникација на офицер од 2. зрачно-десантна чета на 155. бригада.

Оваа бригада, која моментално е распоредена во Сумската област на североистокот на Украина, е веќе позната по бројни воени злосторства, особено во првите месеци од руската инвазија, каде се поврзува со злосторствата во Буча, Ирпин и Гостомел.

ГУР потсетува дека во украински напад на 2 јули со ХИМАРС-систем на командно место на бригадата во местото Коренево, Курска област, загинале 22 руски војници, меѓу кои и командантот на бригадата, полковник Сергеј Иљин, како и генерал-мајорот Михаил Гудков, заменик-командант на руската морнарица. Руските власти ја потврдија смртта на Иљин, но не дадоа детали за причината или точниот датум.

Украинското разузнавање истакнува дека 155. бригада е „една од омилените единици на Владимир Путин“, а нејзиното знаме стоеше зад рускиот претседател за време на прес-конференцијата во декември 2024.

Според украинското обвинителство, до сега се документирани најмалку 273 случаи на егзекуција на украински заробеници од страна на руски војници без судска постапка. Половината од тие случаи се случиле само во текот на 2025 година, што според Киев и ОН укажува на систематска руска политика на ликвидирање на заробеници.

ВИДЕО