Претседателот на Венецуела, Николас Мадуро, ги обвини Соединетите Американски Држави за „измислување нова војна“, откако Вашингтон нареди испраќање на најголемиот воен брод на светот – носачот на авиони USS Gerald R. Ford – во Карипското Море.
Испраќањето на овој носач на авиони, кој може да пренесува до 90 летала, претставува значително зголемување на американската воена моќ во регионот, пишува BBC Verify.
САД тврдат дека овој потег е дел од борбата против трговијата со дрога и дека веќе извршиле 10 воздушни напади врз пловила во тој реон.
Американскиот претседател Доналд Трамп го обвини Мадуро дека е водач на нарко-картел, што венецуелскиот лидер категорично го негира.
Во Венецуела расте стравот дека американското воено присуство всушност има за цел да го собори долгогодишниот противник на Трамп од власт. САД, заедно со многу други држави, не го признаваат Мадуро како легитимен лидер на Венецуела по изборите во 2024 година, кои ги сметаат за нелегитимни и неправедни.
Трамп најавува нови акции
Пентагон вчера потврди дека носачот USS Gerald R. Ford ќе биде испратен во зоната на одговорност на Јужната команда на САД, која ги опфаќа Централна и Јужна Америка, како и Карибите.
Портпаролот Шон Парнел изјави дека дополнителните сили ќе ги „подобрат и зајакнат постојните капацитети за спречување на трговијата со наркотици, како и за уништување на транснационалните криминални организации“.
Мадуро, пак, во своето обраќање ги обвини САД дека бараат „нов вечен воен конфликт“.
„Ветија дека никогаш повеќе нема да започнуваат војни, а сега измислуваат нова“, порача тој преку државните медиуми.
Испраќањето на носачот на авиони обезбедува логистичка и воена поддршка за потенцијални напади врз цели на копно.
