Денес, на 4 јули 2025 година, во Рим се случи експлозија во магацин за гас.
Според италијанските агенции, експлозијата во магацинот на улицата Виа деј Гордијани 32 била предизвикана од истекување на ЛПГ гас за време на претовар од резервоар во цистерна.
Пред експлозијата, која повреди околу 45 лица, областа веќе беше евакуирана и обезбедена од полицијата по пријава за истекување на гасот, а експлозијата се случи околу 8 часот наутро.
Од повредените, 24 се цивили, 11 се полицајци, еден е карабинер, шест пожарникари и тројца медицински оператори. Две лица се во тешка состојба во болницата Санто Еуџенио, на апарати за дишење.
Градоначалникот на Рим, Роберто Гуалтиери, пренесе дека претседателот на Италија, Серџо Матарела, го повикал да изрази солидарност со градот и жителите погодени од експлозијата. Тој истакна дека итните служби и полицијата интервенирале брзо, со што биле избегнати поголеми последици.
Алесандро Грацијани (28), кој работи во спортскиот центар Вила де Сантис на Виа Гордијани, близу до местото на експлозијата, ја опиша драмата:
„Додека одев кон спортскиот центар за да проверам дали има некој, цистерната на Итната помош експлодираше и видов како лим летна кон мене. Лимови од метал паѓаа и палеа работи.“
Неговиот приоритет биле децата – петмината присутни во летниот центар, заедно со двајца аниматори и едно момче, кои навреме биле евакуирани, што според него спречило масакр.
„Додека бегав, паднав. Со периферно гледање видов како лим удира во полициски автомобил и како луѓето паѓаат. Објектот е плод на 20 години работа и посветеност, и ова ми го крши срцето“, рече Грацијани.
Експлозијата во Рим го потресе градот, но брзата реакција на службите спречи поголема трагедија.
