Министерот за здравство, Азир Алиу, денеска се сретна со д-р Сашко Кедев, на средба посветена на размена на информации за наводите за непотребни кардиохируршки интервенции во приватните болници.
Алиу потсети дека од 15 септември сите приватни здравствени установи ќе бидат задолжени да го информираат Министерството за здравство и Управата за електронско здравство за сите извршени прегледи и интервенции.
Министерството за здравство ги повикува сите засегнати страни со информации за евентуални неправилности веднаш да се обратат до институцијата. Транспарентноста се истакнува како еден од главните столбови во работата на министерството и клучен фактор за унапредување на здравствениот систем.
