Со приближувањето на продолжениот викенд, се очекува значително зголемување на сообраќајниот метеж на граничните премини, особено на јужната рута кон Грција.
Празникот посветен на Светите Кирил и Методиј, кој календарски се одбележува на 24 мај, оваа година носи дополнителен слободен ден: понеделник, 25 мај, со што многу граѓани ќе добијат можност за тридневно или подолгo бегство од секојдневието. Токму таа ситуација, како и обично, ги насочува патниците кон туристичките дестинации во соседна Грција.
Од патничката заедница „Пат до Грција“ предупредуваат дека деновите пред празникот и самиот викенд ќе донесат засилен интензитет на движење на границите. Според нивните информации и досегашното искуство, најголем притисок се очекува на граничните премини Евзони и Дојран, каде што вообичаено се создаваат најдолги колони.
Причината е тоа што илјадници патници ја користат оваа можност за краток одмор покрај грчкото крајбрежје, што секогаш резултира со зголемена фреквенција и подолги чекања на премините.
