Првиот вицепремиер Изет Меџити, во рамки на отчетот за една година работа на Владата предводена од ВЛЕН, упати силна порака до опозициските критики, нагласувајќи дека времето на манипулации и закулисни договори е завршено, а граѓаните денес гледаат вистински резултати, а не празни зборови.
„Сега, кога се гледаат реалните резултати – кога училиштата се подобрени, кога земјоделците добиваат вистинска поддршка, кога дијаспората конечно чувствува дека некој работи и за нив – тие зборуваат за ’уништување’. Но вистинскиот распад беше додека тие беа на власт“, изјави Меџити.
Тој ги потсети граѓаните дека токму тие кои денес критикуваат, со години ја игнорираа албанската заедница, го запоставуваа образованието, ги маргинализираа лекарите и ја претворија државата во алатка за лични и партиски интереси.
„Додека ние градиме, тие ширеле лаги. Додека ние отвораме нови можности, тие затворале врати и ја гаснеле надежта. Разликата е јасна – ВЛЕН работи, тие зборуваат“, истакна Меџити.
Меџити посочи на конкретни постигнувања: нови училишта, зголемена минимална плата, нови работни места, конкретна борба против корупцијата и мерки за подобрување на врските со дијаспората. Тој нагласи дека оваа Влада не владее за да остане на власт, туку за да му служи на народот.
„Им го вративме достоинството на граѓаните. И ако за една година направивме толку многу, замислете што сè можеме да постигнеме до крајот на мандатот“, порача Меџити.
