Иако многумина мислат дека купуваат исклучиво според сопствените потреби, експертите предупредуваат дека супермаркетите користат внимателно осмислени психолошки стратегии за да ги задржат купувачите подолго во продавницата и да ги поттикнат да потрошат повеќе.
Психологот Елоиз Скинер открива пет од најчестите трикови што ги користат трговците за да влијаат врз одлуките на купувачите.
Една од најпознатите стратегии е основните производи, како лебот, млекото и јајцата, намерно да бидат поставени во задниот дел од продавницата. Така, купувачите мора да поминат низ речиси целиот маркет, при што се изложени на бројни акции и производи што можат да ги купат импулсивно.
Друг чест трик е честото менување на распоредот на производите. Кога артиклите што редовно ги купувате одеднаш се наоѓаат на друго место, принудени сте да ја обиколите продавницата, а притоа откривате и други производи што не сте планирале да ги купите.
Посебно внимание се посветува и на првиот впечаток при влезот. Свежото овошје, цвеќето, големите натписи за попусти и промотивните понуди создаваат чувство дека токму во тој момент вреди да се купува. Понудите од типот „купи два, третиот е бесплатен“ или временски ограничените акции дополнително го засилуваат впечатокот дека се штеди, иако во пракса често се троши повеќе.
Според Скинер, дури и музиката во маркетите не е случајно избрана. Наместо популарни хитови, најчесто се пушта тивка амбиентална музика која ги опушта купувачите и прави да поминуваат повеќе време во продавницата без да бидат свесни за тоа.
Последниот трик се однесува на количките за пазарење. Колку се поголеми, толку поголема е веројатноста купувачите да ги наполнат со повеќе производи, бидејќи празниот простор создава чувство дека не купиле доволно.
