Иако подготовката на тестенини изгледа едноставно, токму кај ова јадење многумина прават грешки кои значително влијаат врз вкусот и текстурата. Неправилното солење на водата, недоволната количина вода или предолгото варење се само дел од причините поради кои тестенините не излегуваат како што треба.
Лоренцо Бони, главен готвач на компанијата „Барила“, открива дека еден од најважните чекори е правилниот момент за додавање сол.
„Водата треба да се посоли веднаш штом ќе почне да врие, непосредно пред да ги ставите тестенините“, советува Бони.
Според него, ако солта се додаде прерано, може да се забави процесот на вриење. Дополнително, ако солената вода долго врие пред да се додадат тестенините, поради испарувањето концентрацијата на сол се зголемува, па јадењето може да стане пресолено.
Бони препорачува за околу 3,8 литри вода да се додадат приближно четири лажички сол, што е доволно за едно стандардно пакување тестенини. Тој советува и варењето да се одвива на силен оган, за водата постојано да врие.
Готвачот истакнува дека обликот и големината на тестенините не влијаат на количината сол, но треба да се земе предвид сосот со кој ќе се послужат. Ако сосот природно содржи повеќе сол, како кај тестенините со морски плодови, тогаш е препорачливо да се намали количината сол што се додава во водата.
Според Бони, солта не е важна само за вкусот, туку и за текстурата.
„Солта е клучна за постигнување совршена ал денте текстура“, нагласува тој.
Тој објаснува дека без доволно сол тестенините нема да ја имаат препознатливата цврстина, а воедно солта помага и да не се лепат за време на варењето, истовремено истакнувајќи го нивниот природен вкус.
