Перу воведе строги старосни правила за обновување на возачките дозволи, со кои лицата постари од 80 години повеќе не можат да ја обноват дозволата за управување со моторно возило.
Регулативата е донесена од Министерството за транспорт и врски на Перу, а како главна причина се наведува зголемувањето на безбедноста во сообраќајот и потребата да се земат предвид промените во психофизичките способности што може да се појават со возраста.
За возачите на возраст од 70 до 80 години условите се построги. Тие мора да поминат дополнителни здравствени прегледи, а возачките дозволи имаат пократок период на важење.
Медицинските проверки опфаќаат проценка на видот и слухот, мерење на крвниот притисок, како и проверки на когнитивните функции. Правилата прават разлика и меѓу професионалните и непрофесионалните возачки дозволи.
Перуанските власти мерката ја образложуваат со демографските промени и зголемениот број повозрасни лица кои учествуваат во сообраќајот.
Прашањето за старосните ограничувања за возачите се разгледува и во други земји. Во Европската Унија досега не е воведена единствена фиксна старосна граница над која автоматски би престанувало правото на управување возило.
