Седницата на Домот на народите на Федерацијата Босна и Херцеговина беше ненадејно прекината откако во пленарната сала се појави змија, предизвикувајќи паника меѓу присутните пратеници. Инцидентот се случи вчера и веднаш стана вест број еден во регионалните медиуми.
Како што објави босанското издание на телевизијата Н1, змијата била мала, но доволна за да ја прекине расправата и да ги испразни клупите на Домот. Безбедносните служби веднаш реагираа, а зградата беше евакуирана.
По инцидентот, властите наредија целосна инспекција на просториите на парламентот за да се обезбеди сигурноста на сите вработени и пратеници.
Претседателот на Домот на народите, Томислав Мартиновиќ, побара итна истрага. Тој јавно ги повика одговорните институции да утврдат како е можно змија да се најде во строго обезбедена институција како што е парламентот.
„Ова не е шега, туку сериозен безбедносен инцидент. Очекуваме брзи одговори“, изјави Мартиновиќ.
Истрагата е во тек, а јавноста во БиХ со нетрпение ги очекува резултатите.
