Со 49 гласа „за“ и три „воздржани“, Парламентот на Црна Гора донесе одлука за учество на црногорски војници во рамки на Мисијата за воена помош на Европската Унија за Украина (EUMAM UA).
Како што информираше министерот за одбрана Драган Кривокапиќ, црногорските војници ќе се приклучат на мисијата која има за цел обука на украинските сили, особено во домените на хемиско-нуклеарна заштита, медицинска поддршка, минирање и оперативна подготовка на чети.
– Според досега достапните податоци, преку оваа мисија веќе се обучени околу 75.000 припадници на украинската армија. Обуките ги спроведуваат 24 земји-членки на ЕУ кои активно придонесуваат со ресурси и кадар, изјави Кривокапиќ.
Одлуката на Црна Гора претставува дополнителен израз на солидарност со Украина и поддршка на напорите на Европската Унија за стабилизирање на регионот и зајакнување на одбранбените капацитети на украинските сили во услови на тековниот конфликт.
