Српскиот претседател Александар Вучиќ соопшти дека владата располага со безбедносни и разузнавачки податоци според кои во Белград се присутни двајца снајперисти. Се верува дека тие пристигнале со финансиска поддршка, чиј извор е познат на надлежните служби.
Вучиќ не прецизираше каква е нивната цел, но истакна дека полицијата и разузнавачките институции интензивно ги бараат веќе три дена. „Во претходните денови и недели имавме разни безбедносно-разузнавачки информации кои не беа наивни. Дури и не ја информиравме јавноста, затоа што не сакаме да зборуваме“, рече тој.
Претседателот изрази уверување дека надлежните служби ќе успеат да го решат случајот и потенцираше дека владата нема да дозволи надворешно влијание или употреба на насилство за промена на поредокот. „Тие немаат друг пат, не можат да ја поколебаат мојата волја и да ме победат на изборите, тоа го знаат многу добро“, додаде Вучиќ.
Во врска со вчерашните инциденти во шаторската населба пред Домот на Народното собрание, Вучиќ рече дека луѓето во Пионирски парк биле нападнати без причина. Исто така, вчера биле нападнати седум простории на Српската напредна партија (СНС) низ Србија.
