Американскиот претседател Доналд Трамп соопшти дека е постигнат договор кој предвидува целосно разоружување на Хамас и другите вооружени групи во Појасот Газа, како дел од мировниот план за ставање крај на конфликтот.
Во објава на својата социјална мрежа „Трут Соушл“, Трамп оцени дека договорот претставува клучен чекор кон воспоставување нова палестинска власт која ќе соработува со меѓународниот Мировен комитет во обновата и управувањето со Газа.
„Ова е голем исчекор кон траен мир. Израел ќе ја добие безбедноста што ја заслужува, а Газа повеќе нема да биде база за терористички напади“, порача Трамп.
Мировниот комитет, формиран во рамки на меѓународната иницијатива за завршување на војната, потврди дека Хамас се согласил на план за спроведување на следните фази од прекинот на огнот, наведувајќи дека договорот е резултат на повеќемесечни преговори.
Според најавите, процесот ќе се реализира во неколку фази. По завршувањето на разоружувањето, израелската армија треба да се повлече од Појасот Газа, а за безбедноста ќе се грижат меѓународни сили за стабилизација во координација со новата палестинска полиција.
Трамп изјави дека конечната цел е Газа да биде управувана од нова палестинска влада која ќе работи во интерес на своите граѓани.
Сепак, деталите од договорот сè уште не се објавени, а ниту Израел ниту Хамас официјално не ги потврдија или коментираа изјавите на американскиот претседател.
Конфликтот започна на 7 октомври 2023 година по нападот на Хамас врз Израел, по што следуваше голема израелска воена операција во Појасот Газа. Оттогаш, војната предизвика големи човечки загуби и сериозна хуманитарна криза во регионот.
