Украински суд денеска го осуди рускиот војник Дмитриј Курашов (27) на доживотен затвор за убиството на украински воен заробеник, што е прв таков случај од почетокот на руската инвазија на Украина.
Инцидентот се случил на 6 јануари 2024 година, кога Виталиј Ходниук, украински војник, се предал на руските сили. Според обвинителите и сведоците, Ходниук бил невооружен, клекнал и тогаш бил застрелан со митралез од Курашов. Курашов, кој бил заробен од украинските сили кратко по настанот, на судот се изјаснил за виновен, но подоцна во изјава за медиумите тврдел дека е невин и барал да биде вклучен во размена на заробеници.
Судската пресуда има симболично значење за Украина, која тврди дека руските сили егзекутирале голем број украински воени заробеници, иако обвинетите обично се надвор од дофатот на украинската правда. Русија, пак, негира извршување воени злосторства од нејзините војници.
