Портпаролката на руското Министерство за надворешни работи, Марија Захарова, изјави дека Киев не ги крие подготовките за нови терористички напади против Русија. Новите операции, кои ги одобрил претседателот на Украина, Володимир Зеленски, се планирани со предвидена набавка на ракети „томахавк“ од Соединетите Американски Држави, пренесува агенцијата РИА Новости.
„Киевскиот режим не ги крие подготовките за нови терористички напади врз нашата земја со цел ескалација на конфликтот. Зеленски тоа го изјави во своето видео-обраќање на 8 октомври, додавајќи дека ги одобрил плановите за одредени операции на СБУ против Русија“, рече Захарова.
Таа посочи дека Украина се подготвува со оглед на можната набавка на американски ракети со долг дострел „томахавк“.
Претходно, американскиот претседател Доналд Трамп најави дека скоро донел одлука за можна испорака на крстосувачки ракети „томахавк“ за Украина, но посакува да знае како Киев планира да ги користи.
