Германската одбранбена компанија KNDS официјално го промовираше новиот главен борбен тенк „Леопард 2A8“, кој ќе биде дел од германските сили распоредени во Литванија, во период кога Европа ја засилува одбранбената поставеност на источниот брег на НАТО. Свеченото претставување се одржа во Минхен на 19 ноември, во присуство на германскиот министер за одбрана Борис Писториус, пренесува Newsweek.
Производителот истакнува дека станува збор за целосно нова конструкција, а не само надградба на претходните модели. Новиот Leopard 2A8 задржува дел од препознатливите карактеристики – мазноцевен топ од 120 мм и две митралези калибар 7,62 мм – но воведува и низа современи подобрувања. Верзиите на тенковите Leopard се долги години основа на европските оклопни сили, а повеќе земји членки на ЕУ донираа голем број од нив на Украина по инвазијата во 2022 година.
Првите примероци од Leopard 2A8 ќе бидат доделени на новоформираната 45. оклопна бригада во Литванија, инаугурирана во мај од канцеларот Фридрих Мерц. Ова претставува прво трајно распоредување германски трупи во друга земја по Втората светска војна. Бригадата треба да достигне околу 5.000 припадници до 2027 година.
Министерството за одбрана не открива колку тенкови ќе ѝ бидат доделени на бригадата, наведувајќи дека податокот е класифициран како воена тајна.
