Фудбалерот на Ливерпул, Диого Жота (29), и неговиот брат Андре Силва (26) ќе бидат погребани во сабота во нивниот роден град Гондомар, во близина на Порто, по трагичната сообраќајна несреќа што се случи во средата навечер во шпанската покраина Замора.
Бдеењето за браќата започна денеска во Црквата на Воскресението, а како што соопшти локалниот свештеник Хозе Мануел Маседо, погребната церемонија ќе се одржи во сабота во 10 часот наутро по локално време. Двете мртовечки возила беа дочекани со аплаузи и солзи од граѓани и навивачи кои се собраа пред црквата и погребалниот дом.
Жота и Силва загинаа кога нивниот автомобил излетал од патот и се запалил, откако пукнала гума при обид за претекнување. Тие патувале од Порто кон ферибот за Англија, каде што Жота требало да се приклучи на тимот на Ливерпул на предсезонски подготовки. Поради неодамнешна медицинска интервенција, му било препорачано да не лета со авион.
Сè уште не е познато дали погребот ќе биде приватен или јавен, но се очекува присуство на португалскиот претседател Марсело Ребело де Соуза.
