Арсенал и официјално е нов шампион на Премиер-лига, откако лондонскиот гигант ја прекина 22-годишната пауза без титула и повторно се искачи на врвот на англискиот фудбал.
Тимот предводен од Микел Артета ја обезбеди шампионската круна по ремито 1-1 на Манчестер Сити на гостувањето кај Борнмут, резултат што и математички го потврди Арсенал како нов шампион на Англија.
По три последователни сезони во кои завршуваше како вицешампион, Арсенал конечно успеа да ја заврши работата и да ја врати титулата на „Емирати“. „Топчиите“ беа лидери во најголем дел од сезоната, играјќи офанзивен и доминантен фудбал, но во април драмата достигна врв кога Манчестер Сити сериозно се доближи на табелата.
Поразот на Арсенал со 2-1 на „Етихад“ против тимот на Пеп Гвардиола изгледаше како момент што ќе ја сврти титулата кон Манчестер Сити, но избраниците на Артета покажаа карактер, се вратија со серија важни победи и успеаја да ја задржат предноста до самиот крај.
Ова е прва шампионска титула за Арсенал уште од легендарната сезона 2003/04, кога тимот предводен од Арсен Венгер ја освои лигата без ниту еден пораз и влезе во историјата како „Непобедливите“. Во таа историска сезона Арсенал забележа 26 победи и 12 нерешени натпревари, подвиг што и денес важи за еден од најголемите во англискиот фудбал.
Освојувањето на титулата ја прекинува и шестгодишната суша без трофеј за клубот од северен Лондон, а за Артета ова е втор голем трофеј како менаџер на Арсенал и најголем успех во неговата тренерска кариера досега.
Но сезоната за Арсенал сè уште не е завршена. Лондонскиот клуб сега има можност да испише уште поголема историја, бидејќи ќе игра во финалето на Лига на шампиони против актуелниот европски првак ПСЖ. Финалето ќе се игра на 30 мај во Будимпешта, а Арсенал ќе се обиде за првпат во историјата да го освои најпрестижниот европски клупски трофеј.
Шампионскиот пехар од Премиер-лигата Арсенал ќе го подигне по последниот натпревар сезонава против Кристал Палас, по што се очекува големо славје меѓу навивачите кои повеќе од две децении чекаа нова титула.
