Попладнево повторно изби пожар на улицата „Индустриска“ во Куманово, на локацијата каде што се складира отпад од стари автомобили. Од територијалната противпожарна единица Куманово информираат дека огнот зафатил каросерии и сува трева, но ситуацијата е под контрола.
„Во моментов, пожарот е локализиран и наскоро целосно ќе биде изгаснат. На терен сме две екипи со две противпожарни возила“, изјави командирот на ТППЕ Куманово, Дејан Илиевски.
Пожарот е видлив од повисоките делови на Куманово, а граѓаните повторно изразуваат загриженост поради густиот чад и непријатниот мирис. На истата локација на 23-ти јуни годинава веќе избувна сличен пожар, кога во интервенцијата беа ангажирани пет противпожарни возила.
Надлежните апелираат за внимателност и очекуваат наскоро целосно гаснење на пожарот.
