Четворица руски војници загинаа, а неколкумина се во критична состојба откако испиле флаширана вода за која се сомнева дека била затруена. Инцидентот се случил во окупираната украинска област Доњецк и предизвика лавина реакции на социјалните мрежи и кај руските воени блогери, кои повикуваат на итна истрага.
„Кој ја достави водата? Како стигнала до првата линија? И кој ја има можноста да ја затруе?“ – се прашуваат некои од најгласните поддржувачи на руската војна. Притоа се упатуваат директни обвинувања кон Украина за можен чин на саботажа и психолошка војна.
Но од украинска страна пристигнува сосема поинаква верзија: според нив, приказната за „отровната вода“ е уште една во низа манипулации што треба да го прикријат внатрешниот распад на редот и дисциплината во руската армија. Украински извори тврдат дека станува збор за случај поврзан со злоупотреба на дрога меѓу руските војници, што сè почесто излегува на површина во третата година од војната.
Видеа и фотографии од теренот, кои кружат по интернет, наводно прикажуваат мртви и повредени војници во една база во Донбас, додека во позадина други облечени во униформи панично повикуваат медицинска помош.
Случајот дополнително ја нагласува хаотичната состојба во редовите на руската војска, која сè потешко се справува со долгата, исцрпувачка војна, сè помалата мотивација и внатрешните проблеми со моралот и логистиката. Дали навистина станува збор за украинска саботажа или за уште еден симптом на деградација на руските сили, останува прашање за кое јавноста бара одговор.
