Во срцето на Струга, синоќа свечено беше отворен хотелот „Ембла“, модерен туристички капацитет кој претставува успешен спој на традицијата и современото угостителство. На отворањето присуствуваше и првиот вицепремиер и министер за животна средина, Изет Меџити, кој го поздрави овој значаен проект и го оцени како визионерска инвестиција со реална вредност за целиот град.
Хотелот е идеја и реализација на познатиот струшки стопанственик Менди Ќура, за кого беше истакнато дека со својата посветеност и делување придонесува за развојот на локалната економија, отворање на нови работни места и унапредување на квалитетот на туристичките услуги.
„Ембла“ не е само хотел – тоа е концепт внимателно изграден со љубов кон Струга и со визија за одржлив развој на градот. Меџити нагласи дека токму вакви проекти се доказ дека туристичкиот, културниот и економскиот потенцијал на Струга може да се стави во целосна функција на локалниот просперитет.
Според присутните на отворањето, хотелот „Ембла“ е позитивен пример како изгледа модерна, но културно втемелена туристичка понуда, што дополнително ќе го зајакне имиџот на Струга како дестинација за домашни и странски посетители.
