Во недела, селото Ехлоец на падините на планината Стогово кај Кичево ќе го угости културниот настан на отворено „Echoes in the Wild“, кој обединува филм, музика и младинска креативност во едно уникатно искуство.
Програмата ќе започне со филмска проекција во организација на „EcoKult“ и „Nightflix“, по што забавата ќе продолжи на локацијата „На камен“ со диџеј сетови на Ива Арифај од Србија, како и македонските артисти Aco Sound и Дарко Јованоски. Организаторите најавуваат вечер исполнета со енергија на современата електронска сцена од регионот.
„Echoes in the Wild“ има за цел да создаде нова навика кај младите – уметноста и културните настани да се доживуваат како заеднички искуства што можат да се случуваат и во мали села, планини, историски или заборавени предели. „Младите имаат идеи и енергија да ја обликуваат својата креативна сцена насекаде“, велат организаторите.
Настанот е во организација на „Моntparnasse“ и се реализира во рамки на проектот Western Balkans Youth Cultural Fund, што го спроведува Regional Youth Cooperation Office (RYCO) со поддршка од Германското министерство за надворешни работи. Влезот е бесплатен.
