Државниот пазарен инспекторат (ДПИ) најави интензивни и вонредни контроли во пресрет на „Black Friday“ купувачката треска, со цел да спречи нечесни продажни практики и манипулации со попустите. Надзорите ќе се спроведуваат кај сите трговци низ државата, а фокусот ќе биде ставен на транспарентноста и законитоста на објавените акции.
Од Инспекторатот посочуваат дека трговците мора да ги почитуваат пропишаните правила при истакнување на цени и промотивни понуди. Секој обид за измама, лажно претставување на попуст или доведување во заблуда на потрошувачите ќе биде санкциониран согласно законските одредби.
Граѓаните се повикуваат внимателно да ги следат цените пред и за време на акциите и секоја сомнителна нерегуларност да ја пријават на телефонскиот број 191 или преку официјалната веб-страница на ДПИ.
Инспекторатот повторно потсетува дека заштитата на потрошувачите е врвен приоритет и дека одговорноста ја делат и институциите и трговците, кои се повикуваат да ја почитуваат довербата на купувачите во период на зголемена потрошувачка.
