Тешка сообраќајна несреќа со смртни последици се случила вчера попладне на магистралниот пат Крива Паланка – Куманово, во близина на селото Градец.
Според првичните информации, во несреќата учествувал мотоцикл со неготински регистарски ознаки, управуван од 50-годишниот М.Н. од Неготино. Од засега непознати причини, мотоциклот излетал од коловозот и удрил во банкина.
Од силниот удар, мотоциклистот се здобил со тешки повреди и починал на местото на несреќата.
Случајот бил пријавен во ОВР Крива Паланка, по што полициска екипа извршила увид на местото и биле преземени мерки за утврдување на причините и околностите под кои се случила несреќата.
Дополнителните информации за трагичниот настан се очекуваат по завршувањето на истрагата.
