Тешка трагедија ја потресе Грција откако 7-годишно француско дете почина на плажата Маде на Крит, а неговите родители се уапсени под сомнение за изложување на малолетно лице на опасност. Според информациите од Cretapost, досието за случајот веќе е испратено до надлежниот обвинител.
Семејството било на одмор на островот, а несреќата се случила попладне, кога заминале на капење. Во еден момент, детето изгубило свест додека било во водата. Спасувачот го извлекол од морето и започнал со кардиопулмонална реанимација, со која успеал накратко да го врати во живот.
Детето било веднаш пренесено во болница од екипа на итната медицинска служба EKAB, но, за жал, не успеало да преживее.
Наредена е обдукција која треба да ги утврди точните причини за смртта. Полицијата го третира случајот како можна последица на негрижа, што доведе до приведување на родителите.
