Во Хрватска е регистрирана појава на антракс кај добитокот, што предизвика загриженост кај јавноста. Премиерот Андреј Пленковиќ се огласи на седница на Владата, нагласувајќи дека болеста, иако заразна и потенцијално пренослива на луѓе, засега не е потврдена кај ниту едно лице.
„Ризикот за здравјето на населението е низок благодарение на активната примена на сите епидемиолошки протоколи“, изјави Пленковиќ.
Тој ја истакна клучната улога на редовната вакцинација на животните и комуникацијата со ветеринарите во спречувањето на ширењето на инфекцијата. Воедно, премиерот упати апел до сточарите да бидат внимателни, одговорни и да соработуваат со ветеринарните служби.
Како мерка за поддршка, Владата најави две целни програми – една за надомест на штети и друга за обнова на сточниот фонд во погодените региони.
