Министерството за внатрешни работи започна итна евакуација на жителите во најризичната зона околу големиот пожар во фабриката за електронски отпад во Трубарево. Припадници на полицијата од куќа во куќа ги известуваат граѓаните дека мора веднаш да ги напуштат домовите.
Министерот за внатрешни работи, Панче Тошковски, истакна дека најризичниот периметар се наоѓа во радиус од 150 метри од местото на пожарот, каде е утврдено високо ниво на опасност. Од 150 до 200 метри се утврдува средно ниво на опасност, додека од 200 до 400 метри е ниско ниво. Над 400 метри не се забележани штетни загадувања.
Тошковски додаде дека Министерството за здравство веќе дало препораки за вакви кризни ситуации, а полицијата веднаш се упатила кон домовите за да обезбеди безбедност на граѓаните.
