Дигиталното пиратство бележи опаѓање на глобално ниво – според извештајот на аналитичарската компанија MUSO, во 2024 година се регистрирани 216,3 милијарди посети на пиратски веб-страници, што е за 5,7% помалку во однос на претходната година. Сепак, трендовите се различни по категории, а особено расте пиратството во издаваштвото.
Најголемиот пад е забележан кај филмското пиратство – 18% помалку посети во однос на 2023 година, што аналитичарите го поврзуваат со штрајковите во Холивуд и намалената продукција на нови содржини. Според MUSO, едноставно имало помалку што да се „скине“.
Пиратството на телевизиски содржини исто така опаднало за 6,8%, но во рамки на таа категорија, аниме содржините бележат раст. Телевизијата и понатаму останува најголема пиратска категорија со 96,8 милијарди посети.
Издаваштвото, од друга страна, доживува пораст од 4,3%, со вкупно 66,4 милијарди посети на страници што нудат нелегални копии на книги, манга и преводи пред официјалната објава. Тоа ја прави оваа категорија втора најпопуларна по телевизијата.
Пиратството на музика опаднало за значајни 18,6%, што MUSO го припишува на доминацијата на легални и пристапни платформи како Spotify и Apple Music. И софтверското пиратство бележи минимален пад од 2,1%.
Од MUSO заклучуваат дека трендот е јасен: кога легалните опции се скапи, бавни или фрагментирани, корисниците се свртуваат кон пиратство. Но кога содржините се достапни, обединети и ценовно прифатливи – публиката преферира легални извори.
