TikTok ќе се подели на две апликации во САД? Во септември се очекува нова верзија
И покрај тоа што забраната за TikTok во САД формално стапи на сила во јануари, апликацијата престана да функционира само еден ден. Сега, според извештај на порталот The Information, постигнувањето договор за продажба е блиску, со што би се задоволиле законските услови за безбедност, а резултатот ќе биде нова, одвоена верзија на TikTok специјално наменета за американскиот пазар.
Како што се наведува, било каков договор за продажба ќе мора да добие одобрение и од кинеските власти – што не е сигурно, со оглед на актуелните тензии меѓу Пекинг и администрацијата на американскиот претседател Доналд Трамп.
Администрацијата во Вашингтон тврди дека е блиску до финализирање на зделка со група инвеститори надвор од Кина, меѓу кои е и американската технолошка компанија Oracle. Според предложениот модел, сегашниот мнозински сопственик ByteDance би задржал само малцински удел во новата верзија на TikTok, што би било во согласност со Законот за заштита на американските корисници од апликации под странска контрола.
Според информациите, тимот на TikTok веќе работи на нова верзија на апликацијата – со интерен код „M2“, додека постојната верзија се води како „M“. Новата апликација се очекува да биде достапна за преземање на 5 септември.
Претседателот Трамп минатиот месец го продолжи рокот за целосна забрана на TikTok за трет пат, а новиот рок истекува во средината на септември. Според извор на The Information, моменталниот план е старата верзија на TikTok да биде повлечена од продавниците за апликации со појавувањето на новата, а целосното гасење на оригиналната апликација е предвидено за март 2026 година.
