Американската вселенска агенција НАСА влезе во завршна фаза на подготовките за првото лансирање на човечки екипаж кон Месечината по повеќе од половина век пауза, откако ракетата за мисијата „Артемис 2“ пристигна на лансирната рампа во вселенскиот центар „Кенеди“ на Флорида.
Со ова започнува одбројувањето за најважната вселенска мисија на 21 век, која ќе го означи враќањето на човекот во длабоката вселена и ќе ги постави темелите за идните слетувања на Месечината, а подоцна и за мисиите кон Марс.
„Артемис 2“ ќе биде првата мисија со екипаж во рамки на програмата „Артемис“ и ќе однесе четворица астронаути во орбита околу Месечината, без слетување на површината. Оваа мисија има клучна улога – да ја тестира новата ракета SLS и вселенското летало Orion со луѓе на бродот, пред историското слетување што е планирано со мисијата „Артемис 3“.
Последен пат луѓе чекореа на Месечината во 1972 година, со мисијата „Аполо 17“. По 54 години, човештвото повторно е чекор поблиску до враќање на природниот сателит на Земјата како почетна точка за идните вселенски експедиции.
Од НАСА велат дека ова не е само уште еден лет, туку почеток на нова ера:
постојано присуство на човекот на Месечината, развој на лунарна база,
подготовка за првите мисии кон Марс.
