Полначите за мобилни телефони, лаптопи и други електронски уреди не треба да остануваат приклучени во штекер кога не се во употреба, предупредуваат експерти од областа на електротехниката и енергетиката. Според нив, оваа навика може да помогне во намалување на ризикот од пожари, оштетување на уредите и непотребна потрошувачка на електрична енергија.
Сертифицираниот електричар Карл Муравски и извршниот директор на компанијата „Сантрек солар“, Итан Хајн, посочуваат дека исклучувањето на полначите е едноставна, но важна превентивна мерка. Освен што придонесува за поголема безбедност во домот, таа го продолжува и работниот век на самите адаптери.
Според експертите, ненадејните промени во напонот можат да ги оштетат внатрешните компоненти на полначите, а долготрајното приклучување може да доведе до нивно прегревање. Посебно внимание треба да се посвети на евтините универзални полначи што се користат за уреди со поголема потрошувачка на електрична енергија.
Иако современите полначи трошат релативно мала количина електрична енергија кога не полнат уред, експертите велат дека вкупната потрошувачка на повеќе адаптери во едно домаќинство може да има влијание врз годишните трошоци за струја.
Најголеми скриени потрошувачи се полначите за лаптопи и брзите полначи за паметни телефони, особено постарите модели. Покрај финансискиот аспект, нивното исклучување придонесува и за намалување на ризикот од дефекти предизвикани од прекумерно загревање.
Експертите нагласуваат дека одредени уреди, како медицинската опрема, безбедносните системи и некои паметни домашни уреди, можат континуирано да бидат поврзани со електричната мрежа. Сепак, полначите за електрични велосипеди, тротинети и други батериски уреди треба да се исклучуваат веднаш по завршувањето на полнењето.
„Секој уред што се загрева може да претставува потенцијален извор на пожар ако остане без надзор“, предупредуваат експертите, советувајќи поголема внимателност при користење на електрични апарати во домот.
