Украинскиот претседател Володимир Зеленски изјави дека руските сили неделава извршиле масовен воздушен напад врз Украина, фрлајќи над 1.200 лизгачки бомби и лансирајќи 83 ракети. Според неговата објава на Телеграм, што ја пренесува германската агенција DPA, ова претставува сериозно зголемување на теророт врз украинските градови и населени места.
„Русите го зголемуваат теророт врз градовите и општините, за дополнително да ги заплашат нашите луѓе“, напиша Зеленски, посочувајќи дека речиси секојдневно се изведуваат воздушни напади.
Претседателот, исто така, ја пофали ефикасноста на украинската противвоздушна одбрана, посебно во пресретнувањето на иранските дронови „Шахед“, кои Русија редовно ги користи во нападите. „Специјално развиените дронови-пресретнувачи неделава соборија стотици борбени дронови ‘Шахед’“, изјави Зеленски.
Тој нагласи дека интензивно се водат разговори со западните сојузници за понатамошен развој на овие одбранбени технологии. Украина веќе три години се брани од целосната руска инвазија, притоа добивајќи значителна воена поддршка од западните партнери.
Најголемиот руски напад со дронови досега се случи во средата, кога беа лансирани повеќе од 700 беспилотни летала врз украинска територија, од кои значаен број биле успешно пресретнати од украинските сили.
