Украинскиот претседател Володимир Зеленски изјави дека целиот свет се плаши од американскиот претседател Доналд Трамп, но не и тој, и ги негираше тврдењата дека Трамп ги фрлил картите со линиите на фронтот во Украина за време на нивната бурна средба во октомври во Белата куќа.
Зеленски тогаш очекувал дека ќе добие американски крстосувачки ракети „Томахавк“.
„Не фрлаше ништо. Сигурен сум“, изјави Зеленски пред новинарите во Киев, опишувајќи ги односите со Трамп како „нормални“, „деловни“ и „конструктивни“, пренесува денес Гардијан.
Според медиумите, по средбата Трамп наводно вршел притисок врз Зеленски да ги прифати максималистичките услови на рускиот претседател Владимир Путин за завршување на војната, и му рекол дека рускиот лидер ќе ја „уништи“ Украина доколку не се согласи со тие услови.
Зеленски изјави и дека „сите во светот“ се плашат од Трамп, но не и тој.
„Не… ние не сме непријатели на Америка. Ние сме пријатели. Па зошто би се плашеле“, рече Зеленски.
