Претседателот на САД, Доналд Трамп, се откажа од рокот да Украина до четврток го прифати мирниот план што го поддржуваат САД. Тој наведе дека „рокот за него лично е денот кога сè ќе се заврши“ и додаде дека Русија моментално делува како доминантна страна во војната, па за Украина би било во најдобар интерес да постигне договор.
Трамп предупреди дека Русија би можела да добие дел од украинска територија во наредните месеци и додаде дека преговорите за безбедносни гаранции за Украина се водат со европските партнери.
Во разговор со новинарите на Air Force One, на пат кон Флорида за Денот на благодарноста, Трамп рече дека американските преговарачи постигнуваат напредок со Русија и Украина, и дека Москва прифатила некои отстапки, но не ги прецизираше деталите.
Тој додаде дека неговиот изасланик Стив Виткoф наскоро ќе отпатува во Москва на средба со претседателот Владимир Путин, а во преговорите е вклучен и неговиот зет Џаред Кушнер, кој учествувал во преговорите за прекин на огнот во Газа.
Досега, Денот на благодарноста беше планиран како „целниот“ датум за постигнување на договорот, но Трамп и неговите помошници сега велат дека сакаат договорот да биде постигнат што е можно побрзо, без конкретен рок.
