Американскиот претседател Доналд Трамп повторно ја подгреа реториката околу Куба, најавувајќи дека САД би можеле да преземат поостри чекори кон островската држава, откако, како што рече, ќе се „средат прашањата со Иран“.
Во изјава за новинарите, Трамп ја опиша Куба како „неуспешна држава“ и обвини дека американските граѓани со кубанско потекло со децении биле изложени на неправда и насилство, тврдејќи дека многу семејства претрпеле загуби и злоупотреби. Тој повторно го насочи вниманието кон историското владеење на Фидел Кастро, нарекувајќи го долгогодишниот комунистички режим на островот „ужасен“.
Од Хавана, кубанскиот претседател Мигел Дијаз-Канел возврати со остро предупредување до Вашингтон, нагласувајќи дека секое понатамошно заострување на односите може да доведе до директна воена ескалација. „Ние не сакаме војна, но ако бидеме принудени, ќе се бориме“, порача тој, обидувајќи се истовремено да ја намали тензијата и да испрати сигнал за подготвеност.
Во меѓувреме, Трамп во повеќе наврати во јавноста говори за можноста за „преземање“ на Куба и воведување поцврст пристап кон островот, што дополнително ги зголемува дипломатските тензии меѓу двете земји.
