Три американски држави испраќаат свои единици од Националната гарда во Вашингтон за да ги поддржат федералните напори на претседателот Доналд Трамп за борба против криминалот и бездомништвото.
Западна Вирџинија ќе испрати 300 до 400 војници, Јужна Каролина 200, а Охајо 150 во наредните денови. Ова следува по указот на Трамп за федерализација на локалните полициски сили и мобилизација на околу 800 припадници на Националната гарда во округот Колумбија.
Претседателот ги оправда овие мерки како итна реакција на криминалот и бездомништвото, иако градските власти наведуваат дека бројот на насилни злосторства е понизок отколку за време на неговиот прв мандат.
Меѓутоа, одлуката предизвика протест на десетици граѓани на плоштадот „Дупонт Серкл“, кои потоа маршираа кон Белата куќа со транспаренти против „фашистичко преземање“ и „воена окупација“. Протестите се одвиваа додека Трамп се наоѓаше во својот голф-клуб во Вирџинија, по самитот со рускиот претседател Владимир Путин во Алјаска.
