Белата куќа потврди дека администрацијата на претседателот Доналд Трамп се насочува кон зголемено присуство и контрола над Гренланд, нагласувајќи дека присуството на европски војници нема да влијае врз одлуката на САД.
Гласноговорничката на Белата куќа, Каролин Левит, изјави дека Трамп го поставил приоритетот јасно: „Тој сака Соединетите Американски Држави да ја преземат контролата над Гренланд, бидејќи смета дека тоа е најдоброто решение за националната безбедност“.
Левит додаде дека разговорите помеѓу американскиот потпретседател Џ.Д. Венс, државниот секретар Марк Рубио и министрите за надворешни работи на Данска и Гренланд биле „продуктивни“. Двете страни се согласиле да формираат работна група која ќе продолжи со техничките разговори за иднината на територијата, а состаноците ќе се одржуваат на секои две до три недели.
Претходно, неколку европски земји, меѓу кои Франција, Германија, Обединетото Кралство, Холандија, Норвешка и Шведска, испратија свои сили на Гренланд. Данска објасни дека операцијата има за цел зајакнување на способноста за делување во регионот, но САД остануваат решени дека американската контрола е неопходна за заштита на арктичкиот регион од Русија и Кина.
