Едно лице загина, а најмалку 11 се повредени, меѓу кои и едно дете, во синоќешниот напад со руски беспилотни летала врз областа Вишгород, близу Киев, соопштија локалните власти.
Шефот на воената администрација на регионот Киев, Микола Калашник, преку Телеграм го осуди „непријателскиот напад“ и информираше дека шестмина од повредените се пренесени во болница. Спасувачките екипи и пожарникарите интервенирале во висока станбена зграда погодена во нападот и продолжиле со евакуација на жителите.
Калашник предупреди дека бројот на повредени би можел да се зголеми, бидејќи операциите на терен сè уште траат.
Нападот, кој украинските власти го припишуваат на Москва, се случи по вчерашниот удар со украински дронови врз значајна нафтена инфраструктура во руско пристаниште на Црното Море — напад за кој Киев јавно ја презеде одговорноста.
Во меѓувреме, на дипломатски план, Украина испрати делегација во САД за нов круг разговори насочени кон пронаоѓање решение за завршување на војната, во момент кога земјата е под силен притисок и на воениот и на политичкиот фронт.
