Фестивалот „Музика од светот“ во Битола продолжува вечерва со настап на популарната грчка група „Коза Мостра“, која во Центарот за култура ќе понуди енергична програма инспирирана од балканската музичка традиција.
Групата од Солун постои 13 години, а на меѓународната сцена се вброи со учеството на Евровизија. За македонската публика не е непозната – во 2013 година приреди концерт во античкиот театар во Охрид, потсети директорот на НУ Центар за култура – Битола, Сашо Илковски.
„Вечер очекуваме вистински музички спектакл. ‘Коза Мостра’ на сцената ќе спои традиционално и фолклорно со хард рок, хеви метал, ска и диско елементи. Тие настапуваат на бројни меѓународни фестивали и во Битола доаѓаат директно од гостување во Полска“, изјави Илковски, додавајќи дека на концертот ќе присуствуваат и амбасадорката и конзулот на Грција.
Фестивалот ќе заврши утревечер со настап на руската пијанистка Гамазда (Александра Кузнецова), која е позната по нејзиниот уникатен стил на изведба и рок интерпретации на класици од 80-тите и 90-тите години. „Очекуваме незаборавна вечер. Нејзините видеа имаат милионски прегледи, а за финалето подготвивме специјална сцена во битолскиот театар“, дополни Илковски.
Фестивалот „Музика од светот“ се одржува во организација на НУ Центар за култура – Битола, со поддршка од Министерството за култура и Општина Битола.
