Минатата година 16,2 проценти од населението во Европската Унија — односно 72,1 милиони луѓе — живееле под ризик од сиромаштија, покажуваат најновите податоци на Евростат. Процентот е идентичен со оној забележан во 2023 година.
Според анализата, десет европски региони имале стапка на ризик од сиромаштија поголема од 30 проценти. Најкритична е ситуацијата во француската прекуокеанска територија Гвајана, каде што повеќе од половина од жителите (53,3 проценти) се соочуваат со ризик од сиромаштија. Веднаш потоа следуваат шпанскиот регион Сиудад де Мелила со 41,4 проценти и италијанската Калабрија со 37,2 проценти.
На спротивниот крај на скалата, 28 региони во ЕУ бележат стапки под 10 проценти. Најдобра е ситуацијата во романскиот регион Букурешт – Илфов, каде што ризикот од сиромаштија изнесува само 3,7 проценти. Потоа следуваат белгиската Источна Фландрија (5,4 проценти) и автономниот италијански регион Болцано/Бозен (5,9 проценти).
