Путин: Тврдењата дека Русија планира напад врз НАТО се апсурдни
Рускиот претседател Владимир Путин денеска изјави дека наративот за наводни руски планови за напад врз Северноатлантската алијанса е „бесмислица“ која, според него, ја шират западните политичари со цел да ги убедат сопствените граѓани да прифатат зголемување на трошоците за одбрана.
„Идејата дека Русија има намера да ја нападне НАТО е апсолутна измислица, наменета за манипулација на јавното мислење и оправдување на растечките буџети за воена индустрија“, изјави Путин.
Тој нагласи дека Москва не гледа закана во плановите на Алијансата за дополнително вооружување, ниту пак смета дека тие претставуваат вистински предизвик за безбедноста на Русија.
„Не го сметаме ниту едно вооружување на НАТО за закана за Руската Федерација. Нашата безбедност е самодоволна – континуирано ги унапредуваме нашите вооружени сили и одбранбени способности“, истакна рускиот претседател.
Путин, сепак, повтори дека Москва внимателно ги следи активностите на Алијансата и ги оценува како нелогични и непотребни во контекст на актуелната безбедносна ситуација.
