Американски борбен авион се урна во регионот на Персискиот Залив, во близина на Ормутскиот теснец, а пилотот бил успешно спасен, пренесува The New York Times, повикувајќи се на американски официјални лица.
Станува збор за јуришен авион A-10 Thunderbolt II, кој се урнал приближно во исто време кога бил соборен и американскиот F-15E Strike Eagle над Иран. Официјалните лица не откриле повеќе детали за причините за падот, ниту точната локација на инцидентот.
А-10, познат како „Вартог“, е развиен за блиска воздушна поддршка и е специјализиран за уништување копнени цели како тенкови и оклопни возила. Опремен е со моќен 30-милиметарски топ и е познат по својата издржливост, поради што често се нарекува „летачки тенк“.
Овој инцидент доаѓа во време на зголемени тензии во регионот, откако претходно беше објавено дека иранските сили собориле американски авион, по што започна потрага по пилотите.
Според извештаи, иранските сили спроведуваат операции за пребарување во југозападниот дел на земјата, додека регионални власти дури најавиле награда за информации поврзани со пилотите. Од друга страна, дел од американските и израелските медиуми веќе објавија дека еден од пилотите е спасен.
