Најмалку 10 лица, меѓу кои и деца, беа убиени од вооружени напаѓачи за време на верска прослава во градот Ирапуато, во централниот дел на Мексико, објавија денеска локалните власти. Нападот се случил синоќа, кога напаѓачи упаднале во куќа каде се одвивала прославата и отвориле оган врз присутните.
Градската управа потврди дека неколку лица се повредени во нападот со огнено оружје, а истрагата е во тек. Претседателката Клаудија Шеинбаум го осуди нападот како „гнасно масовно убиство“, посочувајќи дека државните институции се веќе вклучени во истрагата.
Градот Ирапуато, кој се наоѓа во сојузната држава Гванахуато, е познат по чести судири поврзани со нарко-картелите. Според локалните медиуми, оваа област е жариште на борби меѓу бандата Санта Роса де Лима и моќниот картел Халиско Нова Генерација.
Гванахуато веќе неколку години е најсмртоносната сојузна држава во Мексико, со повеќе од 3000 убиства забележани само минатата година. Насилството во земјата, поврзано главно со трговијата со дрога, од 2006 година досега однело околу 480.000 животи, а над 120.000 луѓе се водат како исчезнати.
