Германија размислува за можноста да се приклучи на американско-израелската кампања против Иран, доколку Техеран продолжи со нападите врз земјите од регионот, велат извори од германската политика и армија за израелското Army Radio.
Според нив, се разгледуваат различни форми на учество, од директно воздушно бомбардирање до обезбедување логистичка и воздушна поддршка. Официјални лица од германското Министерство за надворешни работи и членови на Комитетот за надворешни работи на Бундестагот потврдија дека подготовките се во тек. Германската амбасада во Израел засега не се огласи за ова известување.
Во меѓувреме, Франција, Германија и Обединетото Кралство заеднички осудија иранските напади и предупредија дека се подготвени да го штитат сопствениот интерес и интересот на сојузниците во Персискиот Залив, вклучително и преку „одбранбени мерки“ против Иран.
Германскиот министер за надворешни работи, Јохан Вадепул (CDU), посочи дека евентуална воена акција на САД и Израел би имала директни последици и за Германија и за Европа. „Нашите војници се подготвени да преземат одбранбени мерки, но за нешто повеќе во моментов не се планира“, нагласи тој, истакнувајќи дека Иран претставува сериозна закана за континентот.
