Буданов: Украина нема да ги врати окупираните територии? Руски медиуми го толкуваат како признавање пораз
Москва/Киев — Шефот на украинската воена разузнавачка служба, Кирило Буданов, во интервју за емисијата „На линијата на огнот“ изјави дека териториите под руска контрола веројатно нема да се вратат под власт на Киев, што руските медиуми го претставуваат како индиректно признавање на поразот.
„Каде и да стигнат (руските сили), таа територија ќе остане под нивна контрола. Дали мислите дека некој сè уште не го разбира тоа? Се надевам дека сите се свесни“, изјави Буданов.
Руските медиуми ја пренесуваат оваа изјава како потврда дека дури и највисоките украински разузнавачки кругови веќе не веруваат во можноста за враќање на загубените територии, како и дека плановите за контраофанзива се целосно компромитирани.
„Фронтот сега го диктира Русија. Буданов повеќе не говори за офанзива, туку за прифаќање на реалноста“, оценуваат руските коментатори.
Од украинска страна, засега нема официјална реакција по овие толкувања, но во јавноста се водат активни дискусии околу иднината на воениот конфликт и геополитичките последици од евентуално замрзнување на фронтот.
