САД ја зголемија наградата на 50 милиони долари за информации што ќе доведат до апсење на претседателот на Венецуела, Николас Мадуро.
Американскиот претседател Доналд Трамп долго време е критичар на Мадуро, кој се врати на функцијата во јануари, по избори обележани со обвиненија за манипулација на гласовите, а резултатите беа широко одбиени од меѓународната заедница.
Државната обвинителка Пам Бонди изјави дека Мадуро е директно поврзан со трговија со дрога и дека САД удвоија наградата за негово уапсување. Таа го обвини Мадуро за соработка со криминални групи, меѓу кои и венецуелската банда „Трен де Арагуa“ и мексиканскиот картел „Синалоа“.
Американската агенција за борба против дрога (DEA) запленила околу 30 тони кокаин поврзан со Мадуро и неговите соработници, од кои скоро седум тони се директно поврзани со него.
Венецуелскиот министер за надворешни работи Иван Гил го оцени ова како „жалосна политичка пропаганда“. Мадуро претходно ги негираше обвинувањата за трговија со дрога, додека Обединетото Кралство и Европската унија воведоа санкции против неговата влада по повторното доаѓање на власт.
