Претседателот Владимир Путин ја информираше групата водечки руски бизнисмени дека е можно да се разгледа размена на делови од територијата контролирана од руските сили во Украина, но дека неговиот приоритет останува целосната контрола над Донбас, пренесува весникот „Комерсант“.
Дополнително, дописникот на весникот од Кремљ, Андреј Колесников, наведува дека Путин ги информирал бизнисмените за деталите од планот на средбата која се одржа завчера во Кремљ. „Русија сè уште е подготвена за отстапки, како што беа направени во Анкориџ“, изјави Путин, додавајќи дека „делумна територијална размена надвор од Донбас не е исклучена“.
Украинскиот претседател Володимир Зеленски пак, во изјава за медиумите, посочи дека украинските и американските делегации работат на финализирање на план од 20 точки за време на разговорите во Мајами, но се уште нема согласност околу отстапувањето на делови од Донбас и иднината на нуклеарната централа Запорожје, која е под контрола на руските сили.
Претседателот на САД, Доналд Трамп, продолжува да настојува на завршување на најсмртоносниот конфликт во Европа од Втората светска војна, а неговиот тим, вклучувајќи го советникот Џаред Кушнер и претставникот Стив Виткоф, преговара со Русија, Украина и европските партнери.
Русија, според проценките, контролира целиот Крим, околу 90% од Донбас, 75% од регионите Запорожје и Херсон, како и делови од Харков, Суми, Николаев и Дњепропетровск. Путин истакна дека мировниот договор треба да се базира на принципите поставени во 2024 година: повлекување на Украина од Донбас, Запорожје и Херсон, како и официјално откажување од целта за приклучување кон НАТО.
„Комерсант“ наведува дека Путин покренал и прашање за заедничко руско-американско управување со нуклеарната централа Запорожје и можност за делумно снабдување на Украина со енергија. Рускиот претседател исто така спомнал интерес за рударење криптовалути во близина на централата.
