Ракометниот клуб Алкалоид вечерва го доби пехарот за триумфот во ЕХФ Европскиот куп за ланската сезона. Македонскиот тим заврши како победник во финалето, откако грчкиот ривал АЕК не се појави на реваншот во Скопје.
Пехарот на капитенот на Алкалоид, Игор Ѓорѓиев, му беше предаден од Божидар Ѓурковиќ, претставник на ЕХФ. Алкалоид имаше предност од првиот финален дуел, а по одбивањето на АЕК да го одигра реваншот, натпреварот беше регистриран со резултат 10:0. Грчкиот клуб, исто така, доби две години суспензија.
Со ова, Алкалоид станува третиот македонски ракометен клуб што освојува европски трофеј, по Вардар и женскиот тим на Кометал Ѓорче Петров.
